In Platonis Phaedrum scholia (Bibliotheca scriptorum Graecorum et Romanorum Teubneriana - BT 2010)

Hermiae In Platonis Phaedrum scholia primus integra edidit a. S. 1810 Fridericus Ast, vir de Platone cum paucis meritus, qui tamen, duce satis infido nitens, libro scilicet Monacensi Graeco 11, aliisque auxiliis destitutus, ea mendosissima vulgavit.
Ne recentioris memoriae rivulos viri docti ultra consectarentur, sed fontem unicum traditionis nostrae haurirent, admonuit H. Jordan, qui primus suspicatus est ceteros libros e Parisino Graeco 1810 fluere. Excellentiam huius libri et M. Schanz et Ch. E. Ruelle confirmaverunt, quorum vota implens egregiae spei adulescens, Paulus Couvreur, novam Hermiae editionem suscepit celeriterque perfecit.
Paulum Couvreur supra meritum laudare difficile est, cum fundamenta textus et interpretationis iecerit primusque et unicus Hermiam critice ediderit. Doctissimus enim ille adulescens, dum Lutetiae Parisiorum versatur, codicem Parisinum cum pulvisculo excussit diligentissimeque eius lectiones exscripsit. Ceteros codices ei ne inspicere quidem contigit, sed catalogos manuscriptorum, qui tunc in usu erant, evoluit laterculumque Hermiae librorum haud despiciendum in praefatione praebuit. Codicum cognationes Couvreur persecutus non est (de eius codicum stemmate satis inepto cf. quae scripsit C. M. Lucarini, De Hermiae…cit., 78); Hermiae autem orationem magno ingenii acumine sescenties callide emendavit. Antequam ultimam manum editioni imponeret, Couvreur adhuc adulescens diem supremum obiit, conspicuo humanarum litterarum detrimento: sciebat, hercle, Graece Couvreur admirabilique diligentia praeditus erat neque dubitandum est quin, si ei longius vivere contigisset, et de aliis veteribus optime meruisset. Editori defuncto iusta soluit L. Bodin, qui folia a Couvreuro relicta in ordinem redegit, quaedam correxit, indicem confecit, bibliopolaeque omnia commisit.